Kūceņu Armands   

Treis rudiņ dzīžamys dzīsmis

Moto: Mes guodojam tī, kur naasam,
         Mes asam tī, kur naguodojam.


1

Leits,
pīdziers
Rudynuoju ols,
trīkš
sevī
aizeidamīs smīklu:
nabyus buobu vosorai
balā daņča pādejuo,
nabyus daņča sūleituo.

Jau
soltums
treisu maiglem mīdz,
gon
ūļuots
syltā saulis suodā:
atīt laiks i ramanem,
šaļts, kod nūstuot ryukalēt,
atīt šaļts, kod puorsavērt.

Laiks
lopom
sataurātom kreit,
Valns
teicās:
dādu kaitu veškys.
Vīn iz viersu, Laimys bārns,
zoru zorim laksteidams,
vīn iz viersu - mīļuodams!


2

Tik skrytuļam ruodīs: iz vītys jys grīžās,
A brauciejam breinums, kai tuoli ceļš aizvess,
Tai vuorpsteite cīši pret sprāduoju paušās,
Jei naatteik - vacei gi dzejis gols zvaigznēs.

Pruots naguorbej ramu, juos lepneibu grūžoj,
Vys jamās pa sovam ļauds pasauli puormeit,
Bet nak jau sevkuram vīns kuorsynoj myužu
I ramaņu jumtus līk īguodu kuormim.

Na vysim tai sader kai kuošam ar speini,
Sirds narymst i nabeidz par sātmalim tēmēt,
A pruots rauga skaitejs pa rokstaudža zeimem,
Kai riedeits, kod saulei vēļ vaiņuku jēme.


3

Skrīn
cauri mūkstu bori,
blūdi sauc par puori,
spūdrums aizsīn acs.

Pruots
atsasaceit vuicuos,
nūmona - vīn tai tuo
aizgrybātuo snādz.

Sauc
ramanis par vīsi sātā,
sauc
prīcys olpā mautu vēļ,
tok
dvēsele jau raitu laižās:
jai
gona meils i baimeigs ceļš.

© Armands Kūceņš, ailis        © 2000-2024, Aņss Ataols Bierzeņš, latgola.lv        Myusu E-posta adress: latgola@latgola.lv

Ituos puslopys pādejuo papruoveišona: 2003 gods nojabra (solnu) mieneša 30 d.