Gerbs

Aktualumi

Volūda

Literatura

Publikacejis

Nūtikšonys

Poezeja

Proza

Viesture

Muoksla

Etnokultura

Dūmu meiti

Breivī servisi

Gostu gruomota

Saitys













. (.)


latgola.lv


Jūrdžu Andryvs   

Zemnīkam irā jauka dzeive

            Jaukuoks nikas navar byut
            Kai par zeminīku kliut.
               Tam, cik reita, vokora,
               Ira dzeive prīceiga.
            Zaļa zuole viņa pļovā
            Un vuorpeņa viņa dryvā
               Aug un rūnās bīzumā,
               Nūleikst un brīst rasnumā.
            Cyuceņas un jēreni -
            Vysi sātas lūpeni.
               Gūve stalī pamauroj,
               Zyrgs pi rūkas paspringoj.
            Gaileits tam uz žūga dzīd,
            Zūsis "Ga, ga!" prūdā īt.
               Peileites un c'uoleiši,
               Un uz jumta bolūži,
            Putneni, kas gaisā skrīn,
            Kazlāni, kas kryumūs līn, -
               Vysi tam par svēteibu
               Dora dzeivi prīceigu.
            Orklam pakaļ īt jam prīks,
            Leidz ar putnim dzīduot prīks.
               Pīsauleitē siļdeitīs,
               Pateikās tur gūzētīs.
            Reitā agri pīcielīs,
            Dīva gaisā atspierdzis,
               Tys pi sova dorba steidz,
               Dreiži vokorā tū beidz.
            Krauči un tī pisari,
            Kaļvi un tī vieveri,
               Muoceituoji, muižturi,
               Advokati, dokturi,
            Firsti un pat kieneni
            Un kab kaidi augstmani -
               Vysi vaigā biedeigi,
               Nūbuoliejuš' skumeigi.
            Zemnīks tai kai uobulis
            Nava vaigā nūbuolis.
               Mini kū vēļ mynādams,
               Laimeiguoks šys struoduodams.
            Mozumā tys puorticis,
            Vairumā koč naticis.
               Maizgorūza soldona,
               Pi tuos mīra viņam gona,
            Dūd tam spāku, styprumu,
            Sirdī viņam mīrumu.
               Ar šū dzīsmi pateicu,
               Tam šū slavi uzteicu.






© Andryvs Jūrdžys, ailis        © 2000-2024, Aņss Ataols Bierzeņš, latgola.lv        Myusu E-posta adress: latgola@latgola.lv

Ituos puslopys pādejuo papruoveišona: 2002 gods maja (lopu) mieneša 27 d.